(Ils statuts ein vegni revidi ed approbai dalla radunonza generala dils 4 da mars 2001)

Num e sedia
Art. 1:
L'uniun catolica da dunnas Rabius ei in'uniun tenor art. 60 dil cudisch civil svizzer cun sedia a Rabius. Ella ei commembra dall'uniun da dunnas catolica dil Grischun, nua ch'ella paga ina contribuziun annuala ed ei aschia era commembra dall'uniun svizra.

Intent ed obligaziun
Art. 2:
L'uniun reunescha las dunnas cun tenuta cristiana. Ella cultivescha e promova il contact denter las commembras e pren posiziun en damondas actualas che pertuccan la dunna.
L'uniun ha las suandontas obligaziuns:
a) organisar sentupadas per senioras e seniors da nies vitg
b) schar leger duas s. messas a caschun dalla mort d'ina commembra
c) schar leger ina s. messa per nossas mummas defunctas per Nossadunna da candeilas, la fiasta titulara dall'uniun
d) representar l'uniun entras duas commembras el cussegl pastoral
e) haver quitau dils vestgius da dumengi'alva
f) segidar tenor pusseivladad da lavar ora la baselgia anavos

Commembras | dretgs ed obligaziuns
Art. 3:
a) La pusseivladad da daventar commembras han tuttas dunnas sesentas a Rabius cun pagar la contribuziun annuala. L'uniun ei aviarta per tuttas confessiuns cristianas.
b) Mintga commembra recepida da niev ell'uniun obtegn ils statuts
c) Scadina commembra ha ils suandonts dretgs:
da far propostas | da vuschar ed eleger | da vegnir elegida | da separticipar a tuttas purschidas organisadas entras l'uniun
d) Scadina commembra ha las suandontas obligaziuns:
da prender part alla radunonza generala (sche pusseivel) | da pagar la contribuziun annuala
e) Scadina commembra sclauda sesezza dall'uniun sch'ella paga el decuors da treis onns negina contribuziun annuala. Ella piarda cheutras tut ils dretgs ed avantatgs dall'uniun.

Organisaziun
Art. 4:
Ils organs dall'uniun catolica da dunnas Rabius: la radunonza generala | la suprastonza | las revisuras da quen
a) La radunonza generala:
Organ suprem ei la radunonza generala. Ella duei haver liug inaga ad onn egl emprem quartal. La raduonza ha il dretg da prender in conclus entras la participaziun dad 1/5 dallas commembras. Ella astga denton decider mo davart fatschentas che figureschan sin la gliesta da tractandas ni vegnan amplificadas ed approbadas avon l'entschatta dalla radunonza. Elecziuns e votaziuns vegnan per regla fatgas cun maun pli. Sch'ei ha pliras candidatas, succeda la votaziun per scrutini. Per elecziuns en l'emprema tscharna vala igl absolut pli. Per ulteriuras tractandas vala il relativ pli. Las radunonzas vegnan clamadas a scret, entras tarmetter tier a mintga commembra la gliesta da tractandas diesch dis avon la radunonza ni entras publicar tala el Fegl ufficial dalla Surselva.
Radunonzas extraordinarias: Radunonzas extraordinarias san vegnir clamadas da tut temps entras la suprastonza ni sche 1/3 dallas commembras giavischa ina tala.
b) La suprastonza.
La suprastonza secumpona da presidenta, actuara, cassiera, duas assessuras, il plevon (preses, mo cun vusch consultatitva – la radunonza ha denton era la pusseivladad d'incumbensar in'autra persuna adattada per quell'incarica).
a) La suprastonza vegn elegida per ina perioda da dus onns. Ina reelecziun ei pusseivla. Il cuoz d'uffeci duei denton buca survargar diesch onns.
b) La suprastonza prepara las fatschentas per mauns dalla radunonza, exequescha ils conclus dallas radunonzas e coordinescha las lavurs.
c) La presidenta meina la radunonza generala ed extraordinaria, convochescha ed empeila las sedutas da suprastonza e representa l'uniun anoviars.
d) L'actuara redegia ils protocols dallas radunonzas. Ella ei el medem mument era vicepresidenta dall'uniun e substituescha la presidenta

Finanzas
Art. 5:
Ils mieds finanzials consistan ord:
a) contribuziun annuala
b) recavs specials
c) donaziuns
d) la facultad dall'uniun ed ils tscheins corrispundents
Ultra dallas spesas ordinarias e da quei ch'ei vegniu decidiu enteifer las radunonzas ei la suprastonza cumpetenta da disponer annualmein d'ina summa da maximal 1000 francs.

Determinaziuns finalas
Art. 6:
Per tuts cass ch'ein buca stipulai en quests statuts valan ils statuts dall'uniun catolica da dunnas dil Grischun.
Art. 7:
Ina revisiun parziala ni totala dals statuts sa vegnir fatga sin proposta dad 1/5 dallas commembras cun dretg da vuschar ni era sin proposta dalla suprastonza.
La soluziun dall'uniun sco era co impunder la facultad sa mo la radunonza generala decider cun 2/3 dallas commembras presentas cun dretg da vuschar.